Posted on

Sumarferð GÍ farin 8. ágúst

Árleg sumarferð Garðyrkjufélagsins verður farin 8. laugardaginn ágúst næstkomandi og liggur leiðin að þessu sinni um Borgarfjörð þar sem margt gróðurkyns er að sjá. 

Lagt verður af stað frá Síðumúla 1 kl. 9,00 og ekið sem leið liggur í Borgarnes. Þar verður Skallagrímsgarður skoðaður og einn garður í einkaeign.  Komið verður við í gróðrarstöðinni Gleym-mér-ei rétt ofan við Borgarnes þar sem Sædís Guðlaugsdóttir á móti hópnum og bíður upp á kaffisopa.  Hún er með mikið úrval fjölærra plantna. Myndin hér að neðan er úr Gleym-mér-ei, fengin að láni frá héraðsblaðinu Skessuhorni. 

Næsti viðkomustaður er Reykholt.  Þar snæðum við hádegisverð á Fosshóteli.  Eftir hádegismat mun séra Geir Waage leiða okkur í allan sannleika um sögu Reykholts.

Frá Reykholti liggur leiðin til  Hvanneyrar.  Þar göngum við um staðinn undir leiðsögn Árna Snæbjörnssonar sem verður fararstjóri í ferðini ásamt Sigríði Héðinsdóttur en bæði þekkja svæðið eins og handarbökin á sér.  Þeir sem vilja geta svo kíkt á Landbúnaðarsafnið og í Ullarselið.

Síðasti viðkomustaður er Ferjukot við Hvítá.  Gaman er að fara yfir gömlu Hvítárbrúna.  Í Ferjukoti tekur Heba  Magnúsdóttir á móti okkur og sýnir sinn fallega heimilisgarð.

Heimkoma um kl. 19,00.

Posted on

Ath: breytt dagsetning: Viltu rækta garðinn þinn – en veist ekki hvar á að byrja?

Garðyrkjufélagið getur hjálpað þér af stað.

Vertu velkomin/n á fræðslufund/námskeið Garðyrkjufélags Íslands í húsi félagsins að Síðumúla 1, Ármúlamegin, á miðvikudagskvöldið 24. júní kl. 20.

Fjallað verður um matjurtarækt í heimagörðum og þann þátt sem hver og einn getur tekið í að skapa betra loftslag og betra gróðurfar á Íslandi – og borða heimaræktað grænmeti.

Einstakt tækifæri til að læra rétt handtök við heimaræktun frá fagmanni.

Þeir sem vilja rækta – en eru hikandi – sérstaklega hvattir til að koma.

Farið verður yfir helstu atriði í matjurtarækt

  • Val á fræi
  • Sáning og uppeldi
  • Undirbúningur beðs
  • Sáning – útplöntun
  • Áburðargjöf
  • Skýling
  • Vökvun
  • Illgresishreinsun
  • Meindýr
  • Helstu tegundir plantna
  • Ræktun í litlu rými

Matjurtaverkefnið er fyrsti hluti námskeiða- og fræðsluátaks sem Garðyrkjufélagið gengst fyrir í samvinnu við Umhverfis- og auðlindaráðuneytið.

Námskeiðið verður haldið á Akranesi á þriðjudagskvöldið 23. júní.

Allir velkomnir, aðgangur ókeypis.

Posted on

Hvernig var árið 2019? – 1. þáttur

Vorið er misjafnt hjá okkur öllum. Veðurfarslega getur verið gríðarlegur munur milli landshluta og sjá sumir ekkert nema snjóskafla allt um kring, meðan aðrir sjá litadýrð springa út í hverju horni. Vorið kemur þó alltaf á endanum. Sjálfur reyni ég að auka áhrifin af vorinu í kringum mig, með því að setja mikið niður af snemmblómstrandi laukum. Það er eitthvað við það að sjá lífið í garðinum kvikna sem kemur manni, þó stundum rólega, í vorgírinn. Hjá mér eru vetrargosarnir fyrstir. Þeir koma á undan vorinu, en blikka mann svona aðeins til að minna á að það er farið að síga á seinni hluta vetrar og styttist í vorið. Í framhaldinu taka við hinir ýmsu krókusar, stjörnuliljur, smáírisar og snotrur, sem allajafna koma sínum skreytingum í gang á undan fyrstu túlipönum og páskaliljum. Vorið virðist einhvern vegin alltaf í senn svo lengi að mæta almennilega á svæðið, en samt svo skyndilega komið og fljótt að líða. Sama gleðin er þó ár eftir ár, með hverju nýju blómi sem opnast, hverri breytingu í garðinum. Sama stressið líka. Kemur rok og rigning um leið og fallegustu blómin hafa opnast? Kemur frost strax eftir að ávaxtatrén hafa opnað sína knúpa? Breytileikinn í smáatriðunum getur verið þó nokkur, en í stóru myndinni breytist samt afar lítið yfir árin.

Ekki get ég sýnt ykkur þetta allt í smáatriðum, en hvert ár hefur 52 vikur og því tók ég sama fjölda mynda og smellti hér inn í nokkrum skömmtum. Tilvalið þótti mér að bjóða ykkur upp á smáréttahlaðborð með nokkrum bitum frá árinu 2019 og kemur því fyrsti skammtur af 4 hér. Reyndar bættust nokkrir konfektmolar við á lokametrunum, svo við förum kannski rétt aðeins yfir 52stk. Fyrsti skammtur nær frá fyrsta degi árs út maí mánuð.