Author: Vilhjálmur Sigurjónsson

Kæru félagar!

Heilsubótar- og fræðslugöngum félagsins í tilefni af 140 ára afmæli þess í ár hefur verið vel tekið og nú er komið að næstu göngum. 

Þrjár göngur verða þriðjudaginn 1. júlí. Þær eru:

Selfoss – Örn Óskarsson, fv. formaður Skógræktarfélags Selfoss, leiðir göngu um Hellisskóg, útivistarperlu Selfyssinga og nærsveitafólks. Mæting er við bílastæðið við Hellisskóg kl. 17.

Reykjavík – Þórólfur Jónsson, garðyrkjustjóri Reykjavíkur stýrir göngu um Grundargerðisgarðinn í Smáíbúðahverfinu í Reykjavík. Best er að koma að garðinum frá Grundargerði en mæting er í garðinum sjálfum. Gangan hefst kl. 17.

Húsavík – Jan Klitgaard, þjóðfræðingur og garðyrkjumaður, leiðir göngu um Garðarslund. Mæting er syðst í götunni Skálabrekku og þessi ganga hefst kl. 20. 

Hver ganga tekur um klukkustund og eru þær öllum opnar.

Bestu kveðjur frá Garðyrkjufélaginu 🙂

Þema:  „Rósir, loftslag og samfélag“

Kæru félagar í Rósaklúbbi Garðyrkjufélags Íslands. Norræna rósahelgin verður haldin á Íslandi dagana 8. – 10. ágúst í sumar. Þetta er einstakur viðburður fyrir íslenska rósaræktendur og gefst ykkur nú kostur á að taka þátt í þessum viðburði með því að skrá ykkur.

Fjölmörg áhugaverð erindi um rósarækt verða á dagskrá, heimsóttir verða einkagarðar og opinberir rósagarðar á stór-Höfuðborgarsvæðinu (þ.e. í Reykjavík, Mosfellsbæ, Kópavogi, Garðabæ og Hafnarfirði). Farið verður í dagsferð um Suðurland þar sem skoðaðir verða einkagarðar og garðyrkjustöðvar og landið skoðað í leiðinni. Kvölddagskrá verður föstudagskvöld í Grasagarðinum og á laugardagskvöld verður hátíðarkvöldverður á Grand Hótel.

Að ráðstefnunni lokinni verður boðið upp á ráðstefnuferð um Vestur- og Norðurland dagana 11.-13. ágúst. Farið verður með rútu norður og einkagarðar skoðaðir á Vesturlandi og síðan gist á miðri leið norður. Daginn eftir verður ekið til Akureyrar og farið í Lystigarðinn sem er alveg einstakur heim að sækja. Gist verður á Akureyri aðra nótt og ekið yfir Kjöl til baka til Reykjavíkur.

Kynnið ykkur dagskrá ráðstefnunnar og nánari lýsingu viðburða. Við hvetjum ykkur til að láta þennan viðburð ekki framhjá ykkur fara. Norræna rósahelgin á Íslandi var síðast haldin sumarið 2012 í einstaklega góðu og hlýju veðri þar sem rósirnar skörtuðu sínu fegursta.

Slóðin á skráningarformið er:  Norræna rósahelgin – Garðyrkjufélag Íslands.  (Athugið: Þegar atriði hafa verið valin í körfuna þá þarf að skoða körfuna og staðfesta skráninguna með greiðslu).

Ávinningur með þátttöku: Þið fræðist um rósarækt, skoðið hvernig aðrir haga sinni ræktun, fáið tækifæri til að deila ykkar þekkingu og reynslu meðal ráðstefnugesta og getið myndað ævilöng vinasambönd þvert á landamæri.

Norræna rósahelgin er viðburður sem haldinn er annað hvert ár af Norræna rósafélaginu og aðildarfélögum þess á Norðurlöndum. Viðburðurinn færist á milli Norðurlandanna fimm: Svíþjóðar, Íslands, Finnlands, Noregs og Danmerkur.

Hefjum rósina til vegs og virðingar – Mætum öll 🙂 

Heiðmörk – Auður Elva Kjartansdóttir, framkvæmdastjóri Skógræktarfélags
Reykjavíkur  og Aðalsteinn Sigurgeirsson skógfræðingur leiða göngu um
Heiðmörk. Gangan er í samstarfi við Skógræktarfélag Reykjavíkur og er
einnig hluti af afmælisdagskrá Heiðmerkur sem fagnar 70 ára afmæli í ár.
Mæting er við stóra bílastæðið við Vífilsstaði kl. 18.

Fjölmenni var í kvöldgöngu í Grasagarði Reykjavíkur þann 24.júní en gangan var í samstarfi Grasagarðsins og Garðyrkjufélagsins og  ein af heilsubótar- og fræðslugöngum sem gengnar eru í sumar í tilefni af 140 ára afmæli félagsins. Göngustjóri var Guðríður Helgadóttir, formaður GÍ og henni til halds og trausts voru starfsmenn garðsins, þau Hjörtur Þorbjörnsson, forstöðumaður, Björk Þorleifsdóttir, fræðslu- og kynningarstjóri og Hjördís Rögn Baldursdóttir garðyrkjufræðingur. Ríflega 300 gestir mættu í gönguna í hellirigningu og nutu leiðsagnar um elsta hluta garðsins. Garðyrkjufélagið þakkar Grasagarðinum kærlega fyrir gestrisnina og gestum fyrir komuna.

Heilsubótar- og fræðsluganga GÍ í Kópavogi þann 24. júní var vel sótt en um 70 gestir mættu til leiks. Því miður forfallaðist göngustjórinn Friðrik Baldursson garðyrkjustjóri Kópavogs en þau Kristján Friðbertsson og Guðríður Helgadóttir hlupu í skarðið og leiddu göngu í Hlíðargarð. Nokkrir göngugestir deildu skemmtilegum minningum úr garðinum, þar á meðal Marteinn Sigurgeirsson kennari, sem hefur skráð ýmsa þætti úr sögu bæjarins, meðal annars með kvikmyndum sínum. Garðyrkjufélagið þakkar gestum kærlega fyrir komuna og sögurnar og göngustjórum fyrir leiðsögnina.