Author: Vilhjálmur Sigurjónsson

Næsta heilsubótar- og fræðsluganga Garðyrkjufélagsins í tilefni af 140 ára afmæli félagsins verður gengin þann 15. júlí.

Hveragerði – Árný Guðfinnsdóttir, garðyrkjustjóri Hveragerðisbæjar, leiðir göngu um Lystigarðinn og nágrenni hans í Hveragerði. Mæting er við innganginn í Lystigarðinn og hefst gangan kl. 17.

Gangan tekur um klukkustund og er öllum opin.

Bestu kveðjur frá Garðyrkjufélaginu.  

Næstu heilsubótar- og fræðslugöngur Garðyrkjufélagsins í tilefni af 140 afmæli félagsins verða gengnar þann 8. júlí. Þær eru tvær talsins og eru:

Kópavogur – Kristinn H. Þorsteinsson, framkvæmdastjóri Skógræktarfélags Kópavogs og Friðrik Baldursson garðyrkjustjóri Kópavogs leiða göngu um Guðmundarlund í Kópavogi. Gangan er einnig hluti af afmælisdagskrá í tilefni af 70 ára afmæli Kópavogsbæjar og er hún í samstarfi við Skógræktarfélag Kópavogs. Mæting er á bílastæðinu við innganginn og hefst gangan kl. 17.

Mosfellsbær – Heiða Ágústsdóttir, garðyrkjustjóri Mosfellsbæjar leiðir göngu um Álafosskvosina í Mosfellsbæ. Mæting er við Álafossbúðina og hefst gangan kl. 17.

Hver ganga tekur um klukkustund og eru göngurnar öllum opnar.

Bestu kveðjur frá Garðyrkjufélaginu.

Ath. Sumarferðin er að verða fullbókuð. Ef hún selst upp er skráð á biðlista ef svo vildi til að einhverjir þyrftu að hætta við (sem gerist stundum). Fólk skráir sig á biðlista með tölvupósti til félagsins: gardurinn@gardurinn.is og taka þarf fram hve mörgum sætum óskað er eftir, en þar að auki þarf símanúmer að koma fram í tölvupóstinum.

Sumarferð Garðyrkjufélags Íslands, ferðin sem allir hafa beðið eftir, verður farin á Akranes (lengri leiðina) mánudaginn 14. júlí næstkomandi.
Lagt verður af stað kl. 9 frá bílastæðinu við Árbæjarsafn og áætluð heimkoma um kl. 17. Fararstjóri verður Guðríður Helgadóttir, formaður GÍ.

Dagskráin er í grófum dráttum þannig:
9:00 – Brottför frá Reykjavík
10:00 – Heimsókn í ræktun Sólveigar Jónsdóttur og Ólafs Jónssonar í Hvalfjarðarsveit
12:30 – Hádegisverður í Golfskálanum á Akranesi – ljúffeng og matarmikil kjúklingasúpa með tilbehör
13:30 – Garðaskoðun á Akranesi (Brekkubraut, Esjubraut og Melteigur)
15:30 – Heimsókn í Ræktunarstöðina Miðvogi

Ferðin kostar kl. 9.000 á manninn og er hádegisverður innifalinn.
Ferðin er komin í sölu í vefverslun félagsins á heimasíðu okkar, sjá
hlekk hér. [Sumarferð]

Þema:  „Rósir, loftslag og samfélag“

Kæru félagar í Rósaklúbbi Garðyrkjufélags Íslands. Norræna rósahelgin verður haldin á Íslandi dagana 8. – 10. ágúst í sumar. Þetta er einstakur viðburður fyrir íslenska rósaræktendur og gefst ykkur nú kostur á að taka þátt í þessum viðburði með því að skrá ykkur.

Fjölmörg áhugaverð erindi um rósarækt verða á dagskrá, heimsóttir verða einkagarðar og opinberir rósagarðar á stór-Höfuðborgarsvæðinu (þ.e. í Reykjavík, Mosfellsbæ, Kópavogi, Garðabæ og Hafnarfirði). Farið verður í dagsferð um Suðurland þar sem skoðaðir verða einkagarðar og garðyrkjustöðvar og landið skoðað í leiðinni. Kvölddagskrá verður föstudagskvöld í Grasagarðinum og á laugardagskvöld verður hátíðarkvöldverður á Grand Hótel.

Að ráðstefnunni lokinni verður boðið upp á ráðstefnuferð um Vestur- og Norðurland dagana 11.-13. ágúst. Farið verður með rútu norður og einkagarðar skoðaðir á Vesturlandi og síðan gist á miðri leið norður. Daginn eftir verður ekið til Akureyrar og farið í Lystigarðinn sem er alveg einstakur heim að sækja. Gist verður á Akureyri aðra nótt og ekið yfir Kjöl til baka til Reykjavíkur.

Kynnið ykkur dagskrá ráðstefnunnar og nánari lýsingu viðburða. Við hvetjum ykkur til að láta þennan viðburð ekki framhjá ykkur fara. Norræna rósahelgin á Íslandi var síðast haldin sumarið 2012 í einstaklega góðu og hlýju veðri þar sem rósirnar skörtuðu sínu fegursta.

Slóðin á skráningarformið er:  Norræna rósahelgin – Garðyrkjufélag Íslands.  (Athugið: Þegar atriði hafa verið valin í körfuna þá þarf að skoða körfuna og staðfesta skráninguna með greiðslu).

Ávinningur með þátttöku: Þið fræðist um rósarækt, skoðið hvernig aðrir haga sinni ræktun, fáið tækifæri til að deila ykkar þekkingu og reynslu meðal ráðstefnugesta og getið myndað ævilöng vinasambönd þvert á landamæri.

Norræna rósahelgin er viðburður sem haldinn er annað hvert ár af Norræna rósafélaginu og aðildarfélögum þess á Norðurlöndum. Viðburðurinn færist á milli Norðurlandanna fimm: Svíþjóðar, Íslands, Finnlands, Noregs og Danmerkur.

Hefjum rósina til vegs og virðingar – Mætum öll 🙂 

Þann 24. júní síðastliðinn leiddi Berglind Ásgeirsdóttir, garðyrkjustjóri Reykjanesbæjar, heilsubótar- og fræðslugöngu um Njarðvíkurskóg. Njarðvíkurskógur er fjölbreytt og áhugavert útivistarsvæði í útjaðri Njarðvíkur (Reykjanesbæjar). Góðmennt var í göngunni enda blíðskaparveður. Garðyrkjufélagið þakkar göngustjóra fyrir leiðsögnina og gestum fyrir komuna.

Fjölmenni var í kvöldgöngu í Grasagarði Reykjavíkur þann 24.júní en gangan var í samstarfi Grasagarðsins og Garðyrkjufélagsins og  ein af heilsubótar- og fræðslugöngum sem gengnar eru í sumar í tilefni af 140 ára afmæli félagsins. Göngustjóri var Guðríður Helgadóttir, formaður GÍ og henni til halds og trausts voru starfsmenn garðsins, þau Hjörtur Þorbjörnsson, forstöðumaður, Björk Þorleifsdóttir, fræðslu- og kynningarstjóri og Hjördís Rögn Baldursdóttir garðyrkjufræðingur. Ríflega 300 gestir mættu í gönguna í hellirigningu og nutu leiðsagnar um elsta hluta garðsins. Garðyrkjufélagið þakkar Grasagarðinum kærlega fyrir gestrisnina og gestum fyrir komuna.

Heilsubótar- og fræðsluganga GÍ í Kópavogi þann 24. júní var vel sótt en um 70 gestir mættu til leiks. Því miður forfallaðist göngustjórinn Friðrik Baldursson garðyrkjustjóri Kópavogs en þau Kristján Friðbertsson og Guðríður Helgadóttir hlupu í skarðið og leiddu göngu í Hlíðargarð. Nokkrir göngugestir deildu skemmtilegum minningum úr garðinum, þar á meðal Marteinn Sigurgeirsson kennari, sem hefur skráð ýmsa þætti úr sögu bæjarins, meðal annars með kvikmyndum sínum. Garðyrkjufélagið þakkar gestum kærlega fyrir komuna og sögurnar og göngustjórum fyrir leiðsögnina.