Hleð Viðburðir

« Allt Viðburðir

Aldingarður Æskunnar i Fjallabyggð 12. júní 2019

12. júní, 2019 frá 13:30 til 14:30

Aldingarður Æskunnar í Fjallabyggð verður formlega hleypt af stokkunum með gróðursetningu aldintrjáa 12. júní 2019 kl. 13.30 við Trjálund norðan við bílaplanið Menntaskólans á Tröllaskaga.

Ómar Valdimarsson formaður Garðyrkjufélags Íslands og Kristinn H. Þorsteinsson, fræðslu-og verkefnisstjóri verða viðstaddir ásamt Önnu Maríu Guðlaugsdóttur formanni Garyrkjufélags Tröllaskaga Norðurs, þau munu ávarpa samkomuna sem samanstendur af starfsfólki leikskólans, nemendum, foreldrum og velunnurum verkefnisins áður en hafist  er handa við að gróðursetja ávaxtatrén og áhugaverð berjayrki.

Hugmyndin felst í því að koma upp sérstökum trjáreitum með ávaxtatrjám og berjarunnum í náinni samvinnu við leikskólanemendur, foreldra, sveitarfélög og aðra velunnara. Eitt af hlutverkum Garðyrkjufélagsins er að leiða saman ólíkar kynslóðir og skapa skilyrði fyrir vaxandi ræktunarmenningu ungs fólks. Aldingarður Æskunnar er kjörinn vettvangur til þess. Áhugi almennings á hvers kyns ræktun hefur aukist. Hvað ræktunarskilyrði varðar hafa frumkvöðlar í ræktun, með bjartsýni og þolinmæði, sýnt að trén geta borið ávexti utanhúss hér á landi. Sæmundur Guðmundsson og Eyrún Óskarsdóttir á Hellu eru þau fyrstu sem hófu markvissa ræktun ávaxtatrjáa. Þau fluttu sín fyrstu tré inn árið 1994 og voru það eplatré og yrkin Transparent Blanche, Haugmann og Sävstaholm og fá þessi yrki sinn sess í Fjallabyggð.  

Árangur af ávaxtarækt getur tekið nokkur ár, en ef rétt er að staðið geta trén borið ávexti hér á landi utandyra. Með þeirri þekkingu sem Garðyrkjufélagið býr að verður spennandi að fylgjast með Aldingarði Æskunnar dafna en Jón Guðmundsson á Akranesi hefur verið félaginu mikilvægur ráðgjafi í verkefninu Aldingarður Æskunnar.